काठमाडौं । सरकारले बसन्त कुँवरलाई प्रहरी महानिरीक्षक (आईजीपी) मा नियुक्त गर्ने निर्णय गरेको छ । शुक्रबार अपरान्ह बसेको मन्त्रिपरिषद बैठकले एआईजी कुँवरलाई आईजीपिमा बढुवा गर्ने निर्णय गरेको हो ।
कुँवरसहित ५ जना आईजीपी बन्ने होडमा हुनुहुन्थ्यो । दुई दिनअघि मात्र उहाँहरुले एआईजीको फुली लगाउनुभएको थियो । कुँवरले २०८१ चैतसम्म नेपाल प्रहरीको आईजिपी सम्हाल्नुहुनेछ।
हालका आईजिपी धिरजप्रताप सिंहले ३० वर्षे सेवा अवधिका कारण शुक्रबार राती १२ बजेदेखि अनिवार्य अवकाश पाउँदै हुनुहुन्छ । उहाँसहित ९ जना उच्च प्रहरी अधिकारीले एक साथ अवकाश पाउन लाग्नुभएको हो ।
एसएसपीबाट डीआईजी बढुवा हुनेक्रममा छलाङ मार्नुभएका कुँवर नेपाली कांग्रेसनिकट मानिनुहुन्छ । उहाँ गत असारमा एसएसपीबाट पहिलो नम्बरमा डीआईजीमा बढुवा हुनुभएको थियो ।
सरकारले एआईजीमा बढुवा गर्दा वरियता हेरफेर नगरि कुँवरलाई पहिलो नम्बरमा राखेको थियो । त्यसअघि एसएसपीमा कुँवर १३ औँ नम्बरमा रहनुभएको थियो । कुँवरका दाई बाबुराम नेपाली कांग्रेस नेतृत्वको सरकारका बेला महान्यायधिवक्ता रहनुभएको थियो ।
२०२६ चैत १५ गते जन्मिएका कुँवर २०५१ चैतमा प्रहरी निरिक्षकबाट सेवा प्रवेश गर्नुभएको हो ।
