सर्वसाधारणलाई ठगि गरिरहेको अस्पतालहरु कानुनी दायरामा आउने सर्वसाधारणको आश
काठमाडौं । कोरोना भाईरसको महामारीको समयमा होस् कि अन्य समयमा पटक पटक शुल्क विवादमा पर्दै गरेका अस्पतालहरुलाई नियमन गर्नको लागि नेपाल सरकारले उपचार वापत लाग्ने शुल्कको विवरण सार्वजनिक गर्न अस्पतालहरुलाई निर्देशन दिएको छ ।
स्वास्थ्य तथा जनसंख्या मन्त्रालयले मंगलबार एक सूचना जारी गर्दै बिरामीको उपचारवापत लाग्ने रकम ७ दिनभित्र सार्वजनिक गर्न सरकारी, निजी, सामुदायिक सबैथरि अस्पताललाई निर्देशन दिएको हो ।
गुणस्तर मापन तथा नियमन महाशाखा प्रमुख डा. मदनकुमार उपाध्यायले जारी गरेको सूचनामा ७ दिनभित्र आफ्नो अस्पताल तथा स्वास्थ्य संस्थाबाट प्रवाह हुने सेवाको प्रकार र त्यसको लागत रकम शीर्षकसमेत उल्लेख भएको मूल्यसूची सञ्चालक समितिबाट निर्णय गराइ वेबसाइट वा सूचना पाटीमा सार्वजनिक गर्न भनिएको छ । त्यस्तै उक्त मूल्यसूचीको विवरण स्वास्थ्य संस्था सञ्चालनको इजाजत दिने निकायमा पनि पठाउन भनिएको छ ।
कोरोना महामारीको समयमा बिरामीको उपचारवापत चर्को शुल्क लिएको, अक्सिजनको समेत अत्याधिक शुल्क लिएको, अनावश्यक परीक्षण गर्न लगाएर आर्थिक व्ययभार थपेको, उपचारका लागि चाहिने सामान बिरामीलाई किन्न लगाएको तथा आवश्यकभन्दा बढी औषधि किन्न लगाएको गुनासो आएकोले पनि शुल्क सार्वजनिक गर्न आग्रह गरिएको मन्त्रालयले जनाएको छ ।
सरकारले यस किसिमको प्रावधान ल्याएपछि कोरोना महामारीको समयमा मनपर्दी शुल्क लिएर सर्वसाधारणलाई ठगि गरिरहेको नीजि अस्पतालहरुलाई अंकुश लाग्ने सम्भावना बढेको छ ।
