काठमाडौँ । मंगलबार रातिदेखि विज्ञान, प्रविधि तथा नवप्रवर्तन मन्त्रालयमा कार्यरत सचिव प्रमिलादेवी शाक्य बज्राचार्य अनिवार्य अवकाशमा गएसँगै सचिवको दरबन्दी रहने ४ निकाय सचिवविहीन बनेका छन् ।
प्रधानमन्त्री तथा मन्त्रिपरिषद्को कार्यालयको आधिकारिक वेबसाइट ओपिएमसिएम डट जिओभी डट एनपीका अनुसार विज्ञान, प्रविधि तथा नवप्रवर्तन मन्त्रालय, नेपाल ट्रस्टको कार्यालय, सार्वजनिक खरिद अनुगमन कार्यालय र न्याय परिषद्को सचिवालयमा सचिव छैनन् ।
यता प्रधानमन्त्री तथा मन्त्रिपरिषद्को कार्यालयमा ६ सचिवलाई जिम्मेवारीविहीन बनाएर अतिरिक्त समूह (जगेडा) मा राखिएको छ । उनीहरूलाई गत जेठ २२ गतेको मन्त्रिपरिषद्को बैठकबाट जगेडामा राखिएको हो । रिक्त ४ निकायमध्ये केही निकाय त्यो समय अगाडिबाट रिक्त छन् ।
प्रधानमन्त्री कार्यालयको वेबसाइटका अनुसार सचिवहरू डा। गोविन्द शर्मा, डा। डिल्लीराम शर्मा, लोकनाथ पौड्याल, डा। कृष्णहरि पुष्कर, हरिप्रसाद मैनाली र डुण्डुराज घिमिरे प्रधानमन्त्री तथा मन्त्रिपरिषद् कार्यालयको अतिरिक्त समूहमा छन् ।
यी मध्य सचिव घिमिरेविरुद्ध अख्तियार दुरुपयोग अनुसन्धान आयोगले भ्रष्टाचार आरोपमा मुद्दा दायर गरेपछि निलम्बनमा छन् । बाँकीलाई जिम्मेवारी नदिएर निलम्बनमा राखिएको हो ।
पोखरा विमानस्थल निर्माणमा कर छुटसम्बन्धी अनियमिततामा अख्तियार दुरुपयोग अनुसन्धान आयोगले भ्रष्टाचार मुद्दा दायर गरेकाले सचिव घिमिरे निलम्बनमा परेका हुन् ।
आयोगले पर्यटन मन्त्रालयमा सहसचिवका रूपमा काम गर्ने बेलामा घिमिरे कर छुटसम्बन्धी अनियमिततामा संलग्न भएको भन्दै विशेष अदालतमा मुद्दा दायर गरेको हो ।
साभारः रातोपाटी डटकम
