तनहुँ । प्रधानमन्त्री तथा मन्त्रिपरिषद् कार्यालयले २२ वटा कम्पनीलाई कालोसूचीमा राख्दा तनहुँका २ वटा निर्माण कम्पनी परेका छन् ।
कार्यालय अन्तरगतको सार्वजनिक खरिद कार्यालय ताहाचलले सूचना प्रकाशित गर्दै सार्वजनिक खरिद ऐन, २०६३ को दफा ६३ को उपदफा (१) बमोजिम सूचना प्रकाशित गर्दा तनहुँको बन्दिपुर गाउँपालिका वडा नं. ४ को खड्गदेवी कन्ष्ट्रक्सनलाई एउटा शिर्षकमा १ बर्ष, अर्को शिर्षकमा २ बर्ष र भिमाद नगरपालिका वडा नं. १ को आयुष एण्ड अनुष कन्ष्ट्रक्सन एण्ड सप्लायर्स १ बर्ष कालोसूचीमा परेको हो ।
सार्वजनिक खरिद कार्यालय ताहाचलले सूचना प्रकाशित गर्दै सार्वजनिक खरिद ऐन, २०६३ को दफा ६३ को उपदफा (१) बमोजिम सूचना प्रकाशित भएको मितिदेखि लागू हुने गरी ती कम्पनीहरूलाई कालोसूचीमा राखिएको हो ।
विभिन्न मितिमा ठेक्का लिने र समयमा ठेक्का पुरा नगर्ने, सम्झौता बमोजिम स्तरिय काम नगर्ने कम्पनीहरुलाई सरोकारवाला सरकारी निकायको आग्रहमा नेपाल सरकार प्रधानमन्त्रीको कार्यालय सार्वजनिक खरिद अनुगमन कार्यालय कालोसूचीमा राख्ने गरेको छ ।
सूचीमा समावेश मध्ये चार कम्पनीलाई तीन वर्ष, एक दुई वर्ष, चार दुई वर्ष र पाँच वटा डेढ वर्षका लाग कालोसूचीमा रहने सूचनामा उल्लेख छ । यस्तै ८ वटा कम्पनी १ वर्षका लागि कालोसूचीमा रहनेछन् ।