हेटौंडा । मकवानपुरको हेटौंडास्थित बसपार्क क्षेत्रमा रहेको एक होटलमा एक युवती मृत फेला परेकी छन् ।
हेटौंडा उपमहानगरपालिका- १० बसपार्कमा रहेको रत्ना होटलमा युवती मृत फेला परेकी हुन् । मृतक महिला हेटौंडा- ११ थानाभर्याङकी २२ वर्षीय एलिशा न्यौपाने रहेको जिल्ला प्रहरी कार्यालय मकवानपुरले जनाएको छ ।
शनिबार बेलुका ७ बजे पहिचान नखुलेका पुरुषसँग होटल प्रवेश गरेकी युवती आइतबार दिउँसोसम्म ननिस्किएपछि होटल सञ्चालकले प्रहरीलाई खबर गरेको थियो ।
प्रहरीले घटनास्थल पुगेर हेर्दा सिरकले मुख छोपेको अवस्थामा युवतीलाई मृत फेला पारेको थियो । खाटको वरपर रगतको टाटा देखिएको प्रहरीको भनाइ छ । ती महिलासँग आएको पुरुष भने शनिबार राति ९ बजे नै होटलबाट निस्किएको र फरार भएको प्रहरीको भनाइ छ ।
होटलमा आएको पुरुषको विषयमा खोजी अनुसन्धान जारी रहेको प्रहरीले बताएको छ ।
साभारः नेपाल प्रेस
