कुलमान घिसिङको निर्णयविरुद्ध हितेन्द्रदेव शाक्यले गुहारे सर्वोच्च

काठमाडौं । नेपाल विद्युत् प्राधिकरणका निवर्तमान कार्यकारी निर्देशक हितेन्द्रदेव शाक्य सर्वोच्च अदालत गएका छन् । सोमबार शाक्यले अदालतमा रिट दायर गरेका हुन् ।
उनलाई अघिल्लो सरकारले ४ वर्षको लागि नेपाल विद्युत् प्राधिकरणको कार्यकारी निर्देशकमा नियुक्त गरेको थियो । जेनजी आन्दोलनपछि बनेको नयाँ सरकारका ऊर्जा मन्त्री कुलमान घिसिङले शाक्यलाई सरुवा गरेका थिए ।
प्राधिकरणबाट सरुवा गरेर शाक्यलाई जल तथा ऊर्जा आयोगमा विशिष्ट श्रेणीको विशेषज्ञ पदमा सरुवा गरेको थियो । आन्दोलनपछि गठन भएको सरकारले सुनुवाइको सामान्य मौका समेत नदिई जिम्मेवारीबाट हटाई अन्यत्र जिम्मेवारी तोकेको भन्दै न्यायको लागि हितेन्द्र सर्वोच्च अदालत गएका हुन् ।
आन्दोलनको बेला उनी प्राधिकरणको प्रतिनिधित्व गर्दै मुलुक बाहिरको कार्यक्रममा थिए । नेपाल आएकै दिन शाक्यले परिवर्तित परिस्थितिमा आफूले सरकारको निर्देशन बमोजिम काम गर्ने सार्वजनिक धारणा राखेको र सोही अनुसार कार्य गर्ने प्रतिबद्धता व्यक्त गरेका थिए । आन्दोलनको बेला शाक्यको घरमा आगजनी भएको थियो ।
नेपाल प्रेस