स्वास्थ्यकर्मीलाई १ महिनाको भत्ता अन्य कर्मचारी र जनप्रतिनिधिलाई ४ महिनाको भत्ता
तनहूँ । महालेखा परीक्षकको कार्यालयले सार्वजनिक गरेको ५८ औँ वार्षिक प्रतिवेदनले तनहूँ जिल्लाका स्थानिय निकायका जनप्रतिनिधि तथा स्थानिय तहमा कार्यकर्ताको चरित्र उदागों भएको छ । कोरोनाको महामारीको समयमा पनि जनताको खुन पसिनाबाट संचित भएको राजश्व कसरी मनपरि गरिएको रहेछ प्रतिवेदनले औल्याएको छ । व्यास नगरपालिकाले पिपिई खरिद, म्याग्दे गाउँपालिकाले राहत वितरण, देवघाट गाउँपालिकाले स्वास्थ्य सामाग्री खरिद, क्वारेन्टिनको खाना खाजा खरिद, शुक्लागण्डकी नगरपालिकाले १ रुपैयामा पाईने मास्कलाई ४ सय रुपैया तिरेर स्वास्थ्य सामाग्री खरिदमा अनियमितता गरेसगै बन्दिपुर गाउँपालिकाले एक कदम अगाडि बढेर कोरोना महामारीको समयमा जनताकाले तिरेको राजश्वको अनियमितता गरेको छ । त्यसरी अनियमितता गरेसगै महालेखा परीक्षकको कार्यालयले उक्त रकम असुल गर्नुपर्ने जनाएको छ ।
महालेखा परीक्षक कार्यालयका अनुसार बन्दीपुर गाउँपालिकाले भत्ता वितरणमा मनपरी गरेको प्रतिवेदनमा जनाईएको छ । स्वास्थ्यकर्मीलाई १ महिनाको मात्र भत्ता उपलब्ध गराएकोमा प्रशासनिक कर्मचारी तथा पदाधिकारीलाई ४ महिनाको पूरा अवधिको तलब बराबरको १२ लाख ११ हजार खर्च गरेको छ । कोरोना भाइरस संक्रमणको उपचार संग्लन जनशक्तिको जोखिम भत्ता व्यवस्थापन आदेशले चैत ९ गतेदेखि मात्र भुक्तानी दिने उल्लेख गरिएकोमा चैत १ गतेदेख नै लागू हुने गरी भत्ता भुक्तानी गरेकाले ८१ हजार रुपैयाँ असुल गर्नुपर्ने देखिएको छ ।
प्रत्यक्ष संग्लन जनशक्तिबाहेक प्रशासनिक जनशक्तिलाई ५० प्रतिशत रकम भुक्तानी गर्नुपर्नेमा चार महिनाको सबै भत्ता भुक्तानी गरेकाले बढी भुक्तानी भएको ५ लाख ६५ हजार रुपैयाँ असुल गर्न भनेको छ । आदेशअनुसार पदाधिकारीलाई भत्ता दिन मिल्ने देखिँदैन । तर, बन्दीपुरले प्रमुख र उपप्रमुखलाई समेत तलब स्केल ३८ हजार र ३६ हजार रुपैयाँका दरले ४ महिनाको २ लाख ९६ हजार रुपैयाँ भुक्तान गरेको भेटिएको छ । ‘आदेशविपरीत हुने गरी भत्ता दिनु मनासिव देखिएन’, महालेखाले भनेको छ ।
यसरी प्रसाशनिक कर्मचारी तथा जनप्रतिनिधिहरुले ४ महिनाको भत्ता लिएर अनियमितता गरिरहेको रिर्पोट बाहिरिरहदा उक्त गाउँपालिकाले महालेखा परिक्षकको कार्यालयले भनेझै असुल गर्न लागेको भनेर सूचना ननिकाल्दा सर्वसाधारणले औला उठाईरहेका छन् । एकजना स्थानिय ” स्वास्थ्यकर्मीलाई १ महिनाको भत्ता दिएर अरुले ४ महिनाको भत्ता खाएर ईतिहास रच्दा पनि जनता नजाग्नु अचम्म लाग्दो भएको छ ”’ भन्नुहुन्छ साथै उहाँको प्रश्न छ ”जनताको सेवा गर्छु भनेर जानेले शिर्षक मिलाई मिलाई कोरोना महामारीको विषम परिस्थितिमा खाएको भत्ता महालेखा परिक्षकको कार्यालयले असुल गर्नु भनेपछि असुल उपर होला कि नाई ?”
