काठमाडौं । पुषको चिसो मौषमा चिसो बढेसगै वायु प्रदूषण बढेको बताउँदै वातावरण विभागले काठमाण्डौ उपत्यकावासीलाई घरबाहिर निस्किँदा विशेष सावधानी अपनाउन अपिल गरेको छ । विभागले वातावरण प्रदुषित हुदै गईरहेकोले अनावश्यक काममा ननिस्कनका साथै बालबालिका, ज्येष्ठ नागरिक, श्वासप्रश्वास र मुटु सम्बन्धी रोगका बिरामीलाई सकेसम्म घरबाहिर ननिस्किन अनुरोध गरेको छ ।
वातावरण विभागका महानिर्देशक मुकुन्दप्रसाद निरौलाले पौष २१ मंगलबार दिउँसो प्रेस विज्ञप्ति जारी गर्दै , ‘उपत्यकामा बिहान र बेलुकीको समयमा प्रदुषण अत्यधिक बढेको पाइएको छ । यसबाट तपाईं हाम्रो स्वास्थ्यमा नकरात्मक असर पर्न सक्दछ ’ भन्नुभएको छ ।
विज्ञप्तिमा काठमाण्डौ बाहेक नेपालगञ्ज, विराटनगर लगायतका क्षेत्रमा पनि वायु प्रदूषणको मात्रा उच्च भएको पाइएको उल्लेख गर्दै तराई क्षेत्रका नागरिकलाई पनि विशेष सतर्कता अपनाउन अनुरोध गरिएको छ ।
साथै विभागले फोहोर र आगो बाल्दा पनि वायु प्रदूषण बढ्ने भएकाले त्यस्तो नगर्न पनि अनुरोध गरेको छ । उक्त विज्ञप्तिमा ‘वायु प्रदूषण मौसममा पनि भरपर्ने भएकाले मौसम यस्तै भइरहेमा केही दिनसम्म प्रदुषण यस्तै रही रहने अथवा अझै खराब हुनसक्ने सम्भावना भएकाले विशेष सावधानी अपनाउनु हुन अनुरोध गरिन्छ ।’