वासिङ्टन डीसी । अमेरिका र चीनबिच जारी व्यापार तनावको बिच दुई देशका राष्ट्रपति एक अर्कालाई भेट्ने खबर आएको छ । राष्ट्रपति डोनाल्ड ट्रम्पले चाँडै चिनियाँ राष्ट्रपति सी जिनपिङसँग भेट्ने तालिका रहेको अमेरिकी अर्थमन्त्री स्कट बेसान्टले बताए ।
यसै महिना एसिया–प्रशान्त आर्थिक सहयोग (एपेक) शिखर सम्मेलनको क्रममा हुने उनले बताएका छन् । ट्रम्प यस भेटको लागि पूर्ण रूपमा तयार रहेको उनको भनाइ छ । दुई नेताहरूबिच धेरै राम्रो सम्बन्ध भएको र छलफल जारी राखिरहेको पनि बताइएको छ ।
अमेरिका र चीनबिच हाल उच्चस्तरीय वार्ता भइरहेको पनि बेसान्टले बताए । दुवै पक्षले आईएमएफ र विश्व बैंकको वार्षिक बैठकहरूमा पनि कार्य–स्तरीय छलफल गरिरहेको भनिएको छ । ‘म चीनसँग भइरहेको छलफललाई लिएर आशावादी छु । हामी धेरै तहमा संवाद बढाउँदैछौँ ।’ उनले भने ।
दुई देशहरूबिचको व्यापार युद्ध फेरि चर्किएको बेला यो बयान आएको हो । हालै, चीनले दुर्लभ खनिज पदार्थको निर्यातमा प्रतिबन्ध लगाएको थियो । यसपछि ट्रम्पले बैठक रद्द गर्ने धम्की दिए । प्रतिक्रियामा, ह्वाइट हाउसले चीन विरुद्ध नयाँ कर प्याकेज घोषणा गर्यो । ट्रम्पले चीनबाट आउने सामानमा थप सय प्रतिशत ट्यारिफ लगाउने घोषणा गर्दै चीनले अमेरिकी बजारमा अनुचित फाइदा लिन नसक्ने भनेका थिए ।
एपेक शिखर सम्मेलनमा हुन लागेको यो बैठक व्यापार तनाव कम गर्ने दिशामा एक महत्त्वपूर्ण कदम साबित हुन सक्ने विश्लेषकहरू ठानिरहेका छन् । दुई देशहरू बिचको वार्ता पुनः सुरु हुनुले विश्वव्यापी बजारमा स्थिरताको संकेत दिन सक्छ । यद्यपि, ट्रम्प प्रशासनले नयाँ १०० प्रतिशत अतिरिक्त ट्यारिफ र सफ्टवेयर निर्यात नियन्त्रणहरू लगाउने निर्णय पछि वातावरण तनावपूर्ण छ ।
