तनहुँ । राष्ट्रिय विपत्तिको यस विषम परिस्थितिमा मानवीय सहयोग र सामाजिक उत्तरदायित्वप्रति प्रतिबद्धता जनाउँदै व्यास नगरपालिका–१ स्थित जनचेतना टोल विकास संस्था र जनचेतना आमा समूहले प्रधानमन्त्री राहत कोषमा आर्थिक सहयोग गर्ने निर्णय गरेका छन्।
विपत्तिमा परेका नागरिकको पीडामा थोरै भए पनि मल्हम लगाउने तथा राहत, उद्धार र पुनर्स्थापनाका कार्यमा सहयोग पुर्याउने उद्देश्यले दुवै संस्थाले संयुक्त रूपमा रु. ५० हजार सहयोग गर्ने निर्णय गरेका हुन्।
निर्णयअनुसार जनचेतना टोल विकास संस्थाले रु. २५ हजार र जनचेतना आमा समूहले रु. २५ हजार गरी जम्मा रु. ५० हजार प्रधानमन्त्री राहत कोषमा प्रदान गरिने भएको छ।
प्राकृतिक विपत्तिका कारण विभिन्न स्थानमा नागरिकले जनधनको क्षति व्यहोर्नुपरेको अवस्थामा राज्य तथा प्रभावित नागरिकलाई सहयोग गर्नु सबैको साझा दायित्व भएको भन्दै संस्थाहरूले आफ्नो क्षमताअनुसार सहयोगको हात अघि बढाएका हुन्।
जनचेतना टोल विकास संस्था र आमा समूहले विपत्तिको समयमा एकआपसमा सहयोग, सहकार्य र मानवीय भावना अभिवृद्धि गर्नुपर्नेमा जोड दिएका छन्। उनीहरूले आफ्नो सानो सहयोगले पनि विपत्तिमा परेका परिवारको राहत तथा पुनर्स्थापनाका लागि केही योगदान पुग्ने विश्वास व्यक्त गरेका छन्।
‘विपत्तिमा परेका नागरिकको पीडामा साथ दिनु नै मानवीय दायित्व हो’ भन्ने भावनाका साथ गरिएको उक्त सहयोगले सामाजिक एकता, सद्भाव र सामूहिक उत्तरदायित्वको सकारात्मक सन्देश दिएको छ।
स्थानीय स्तरका संघसंस्था तथा नागरिकले विपत्तिको समयमा आफ्नो क्षमता र स्रोतअनुसार सहयोग गर्न सके राहत तथा पुनर्स्थापनाका प्रयासलाई थप प्रभावकारी बनाउन सकिने जनचेतना टोल विकास संस्था र आमा समूहको विश्वास रहेको छ।
