कञ्चनपुरमा सडेको अवस्थामा ३ जनाको शव भेटियो

धनगढी । कञ्चनपुरमा ३ जनाको शव भेटिएको छ । सडेको अवस्थामा ३ जनाको शव भेटिएको प्रहरीले जनाएको छ ।
इलाका प्रहरी कार्यालय त्रिभुवनबस्तीका प्रमुख, प्रहरी निरीक्षक (इन्सपेक्टर) नरेशराज मल्लले आइतबार साँझ ३ जनाको शव भेटिएको बताउँदै सडेको अवस्थामा भएकाले पहिचान गर्न समस्या भएको बताए ।

‘२ वटा शव कंकाल भइसकेको अवस्थामा भेटिएका छन्’ प्रहरी निरीक्षक मल्लले भने, ‘अर्को चुरा र लुगाको आधारमा महिलाको भए पनि पहिचान गर्न सकिएको छैन ।’
आँखाले हेरेर शवको पहिचान गर्न नसकिएपछि प्रहरीले डीएनए संकलनको तयारी गरेको छ । डीएनए संकलनका लागि चिकित्सकको टोली घटनास्थलतर्फ आइरहेको प्रहरी निरीक्षक मल्लले बताए ।

लालझाडी गाउँपालिका १ को उखुबारीमा २ जना र पुनर्वास नगरपालिका १० को दोदा नदी नजिकै अर्का १ जनाको शव फेला परेको हो । (साभारः अनलाईन खबर)